दलित र बिपन्नलाई बिद्युत मिटर जडान निःशुल्क

395
views

नवदृष्टि संवाददाता
पर्वत, ३१ असोज । पर्वतको कुस्मा नगरपालिकाको एक वडाले दलित र बिपन्न परिवारलाई बिद्युत जडानका लागि अनुदान दिने निर्णय गरेको छ ।
कुस्मा नगरपालिका वडा नं १४ आर्थर डाडाँखर्कले वडा भित्रका न्युन आर्थिक अवस्था भएका दलित र अन्य जातिका पनि बिपन्न परिवारलाई बिद्युत मिटर जडानमा अनुदान दिने निर्णय भएको हो ।
बिपन्न र दलित परिवारका सदस्यले आर्थिक अभाबमा बिद्युतको मिटर जडान गर्न नसकेको र बिद्युत उपभोगमा समस्या देखिएपछि अतिबिपन्न परिवारलाई बिद्युत मिटर र तार खरिदमा अनुदान दिने निर्णय भएको वडा सदस्य होमनाथ रिमालले जानकारी दिए ।
कुस्मा नगरपालिका वडा नं १४ साबिकको आर्थर डाडाँखर्क गाबिसका तीन वडामा केन्द्रिय प्रसारण र बाँकी ६ वडामा सामुदायिक बिद्युतीकरण गरिएको छ । निर्वाचित जनप्रतिनिधीले जनतालई प्रत्यक्ष राहत दिने निर्णय भए अनुसार प्रतिबद्धता कार्यान्वयन गरिएको वडा अध्यक्ष भिमप्रसाद गुरुङ्गले बताए ।
यसैगरी वडाको मंगलबार बसेको बैठकले तिहारमा राती ८ बजे पछि देउसी भैलो नखेल्ने निर्णय पनि गरेको छ । रातको समयमा देउसी भैलो खेल्दा झैझडा हुने भएकाले शान्तिपुर्ण र मर्यादित बनाउन राती आठ बजेसम्म वडाभित्र देउसी भैलो खेल्न दिने निर्णय गरेको वडा अध्यक्ष भिमप्रसाद गुरुङ्गले बताए ।