उत्तर कोरियाली ‘तानाशाह’सँग सोझै कुराकानी भएको ट्रम्पको खुलासा

512
views

राष्ट्रपति ट्रम्पले दुई देशका नेताहरूबीचको भेटघाटलाई ऐतिहासिक तुल्याउनका लागि अमेरिकी अधिकारीहरूले उत्तर कोरियाका अधिकारीहरूसँग बातचित गरेका जनाएका छन् । उनले भनेका छन्– ‘हामीले अत्यन्त उच्च तहमा सोझै कुराकानी गर्यौँ ।’

अमेरकी राष्ट्रपति डोनाल्ड ट्रम्पले उत्तर कोरियाका नेता किम जोङ उनसँग अमेरिकाको प्रत्यक्ष कुराकानी भएको बताएका छन् । ट्रम्प र किमबीच सोझै कुराकानी भएको भनी अफवाह चल्न थालेपछि राष्ट्रपति ट्रम्पले यस्तो भनाई सार्वजनिक गरेका हुन् । तर, उनले अमेरिकाको तर्फबाट किमसँग कसले भेटघाट वा कुराकानी गरेको भन्नेचाहिँ खुलाएका छैनन् ।

‘पासिङ्टन पोष्ट’मा प्रकाशित समाचार अनुसार अमेरिकी गुप्तचर एजेन्सी सीआईएका निर्देशक माइक पोम्पियोले ईस्टरको अवसरमा उत्तर कोरियाको गोप्य यात्रा गरेका थिए । सोही क्रममा पोम्पियोले किम जोङ उनसँग भेटेका हुन् ।

ट्रम्पको भनाई उद्धृत गर्दै समाचारमा जनाइएअनुसार उत्तर कोरियाली नेता किम जोङ उनसँग भेटघाट गर्नका निम्ति विभिन्न पाँच स्थानमाथि विचार भइरहेको छ । उनले यी सबै कुरा जापानका प्रधानमन्त्री सिन्जो आबेको उपस्थितिमा खुलाएका हुन् । आबे ट्रम्पसँग भेट गर्न फ्लोरिडा पुगेका छन् ।

जापानी प्रधानमन्त्री सिन्जोले ट्रम्पको कुरा सुनेपछि साहसी व्यक्ति भन्दै उनको प्रशंसा गरेका छन् । अमेरिका–उत्तर कोरियाबीचको वार्ताको ठोस नतिजा आउने अपेक्षा पनि आबेले गरेका छन् । सम्भावित उक्त वार्ताका क्रममा कोरियाली प्रायद्वीपमा जापानी सुरक्षाको पनि विशेष ख्याल राखिने अपेक्षा आफूले गरेको राष्ट्रपति ट्रम्पसमक्ष प्रधानमन्त्री आबेले खुलस्त गरे ।

उत्तर कोरियासँगको वार्ताका क्रममा ट्रम्पले जापानी सरोकारलाई बेवास्ता गर्न सक्ने चर्चा जापानमा चलेको परिवेशमा प्रधानमन्त्री आबेले ट्रम्पसँग भेट गर्नुका साथै उपरोक्त अभिव्यक्ति दिएका हुन् । उत्तर कोरियाको छिमेकी जापान अमेरिकाको प्रमुख सहयोगी देश हो ।

राष्ट्रपति ट्रम्पले गत महिना उत्तर कोरियाको तर्फबाट सोझै कुराकानी गर्न आएको प्रस्ताव स्वीकार गरेर अन्तर्रा्ष्ट्रिय समुदायलाई आश्चर्यमा पारेका थिए । ट्रम्पको भर्ना छ कि उत्तर कोरियाका नेता किमसँग आगामी जून या त्योभन्दा पहिले नै भेटघाट हुन सक्छ ।