पोखरा–बागलुङ्ग लोकमार्गमा दैनिक आठ घण्टा सवारी बन्द

808
views

पर्वत, १२ असार । मध्यपहाडी लोकमार्गको पोखरा–बागलुङ खण्ड फराकिलो बनाउने र सुधार गर्ने क्रममा दैनिक आठ घण्टा पर्वत खण्ड बन्द हुने भएको छ । सोमबार जिल्ला प्रशासन कार्यालय पर्वतको संयोजनमा बसेको सर्वपक्षिय बैठकले असार १५ देखि दैनिक ८ घण्टा सडक बन्द गर्ने निर्णय गरेको छ । सडक निर्माण एवं सुधारको क्रममा यात्रुले सास्ती खेपेका छन् ।

लोकमार्गको पर्वत खण्डमा पर्ने डिमुवा देखि बेतनी बिचको माहुरी भिर र दोबिल्ला देखि चुवा सम्मको चुवा भीरमा सडक फराकिलो बनाउन सडक बन्द गरेर काम गर्ने निर्णय भएको हो ।

पर्वतको सडक खण्डमा बिहान १० बजे देखि दिउँसो १२ बजे सम्म सडक बन्द हुनेछ भने दिउँसो १ बजे देखि ४ बजे सम्म पनि सडक बन्द हुने भएको छ । साँझ ५ बजे देखि राती ८ बजे सम्म पनि सडक बन्द हुने भएको छ ।

बर्षा याममा यात्रुको चाप पनि कम हुने र सवारी साधन पातलो चल्ने कारणले आठ घण्टा सडक बन्द गरेर काम गर्ने निर्णय भएको निर्माण कम्पनी लामा कन्ट्रक्सन कम्पनीका प्रोजेक्ट म्यानेजर गोबिन्द भुसालले बताए ।

आयोजना संग ३६ महिनामा निर्माण काम सक्ने गरि सम्झौता भएपनि २६ महिनामा काम सम्पन्न गर्ने लक्ष्य सहित निर्माण कार्य गर्न लागिएको सर्वदलीय बैठकमा उनले दाबी गरे । ‘हामीले सम्झौता भन्दा १० महिना अगाबै निर्माण सम्पन्न गर्ने लक्ष्यका साथ काम तीब्र बनाउने योजना बनाएका छौ’ उनले भने ‘कठिन भीरहरुमा कटानका लागि केही समय सडक बन्द नै गरेर निर्माण गर्नुपर्ने आवश्यकता छ’ ।

आयोजनाको पर्वतको प्रवेशद्वार देखि मालढुंगा सम्मको २३ दशमलब ७६९ किलोमिटर स्तरउन्नतीको काम लामा कन्ट्रक्सन प्रालिले जिम्मा लिएको छ । कम्पनीले ८३ करोड ९८ लाख रुपैयामा पर्वत खण्ड स्तरउन्नतीको कामको ठेक्का लिएको छ । अहिले सम्म १२ प्रतिशत काम सकिएको ब्यबस्थापक भुसालले जानकारी दिए ।

सर्वदलीय बैठकमा बोल्दै जिल्ला समन्वय समिति पर्वतका अध्यक्ष मनोहर बिश्वकर्मा पौडेलले सर्वसाधरण यात्रु र यातायात ब्यबसायीलाई पनि मर्का नपर्ने र राष्ट्रिय गौरबको आयोजनाको निर्माण कार्यलाई पनि सघाउ पु¥याउने गरि बन्दलाई ब्यबस्थापन गर्न जरुरी भएको बताए । उनले युद्धस्तरमा काम गर्ने र छिटो अवधीमा नै यातयात बन्द गर्ने कुरालाई अन्त्य गर्न तर्फ सबैले सहयोग गर्न आवश्यक भएको कुरामा जोड दिए ।

पर्वतका प्रमुख जिल्ला अधिकारी गुरुदत्त ढकालले पोखरा बागलुङ्ग राजमार्गको अन्य क्षेत्रमा समेत सडक बन्द गर्ने कार्य एकै पटक गर्न समन्वयकारी काम गर्ने प्रतिबद्धता जनाए । उनले सडक बन्द हुने स्थानमा बैकल्पिक सडक निर्माण गर्न सम्झब भए सम्म त्यसतर्फ पनि समन्वय गरिने बताए ।

चुवामा दोबिल्लाबाट माथि डिल सम्म बैकल्पिक सडक निर्माण गरि यातयात बन्द हुँदा पनि सवारी आवगमन सुचारु गर्ने बैकल्पिक सडक खुलाउन तर्फ पनि संभब भए सम्म पहल गर्ने जानकारी दिए ।