काठमाडौं, २८ असार । थाइल्यान्डको एक गुफामा दुई हप्ताभन्दा बढी समयसम्म फसेपछि उद्दार गरिएका १२ जना बालक र उनीहरुका फुटबल प्रशिक्षकको भिडियो पहिलो पटक सार्वजनिक भएको छ ।
अस्पतालमा उपचार गराइरहेका उनीहरुको भिडियो सार्वजनिक गरिएको हो । गुफामा फसेका उनीहरुलाई तीन दिनको प्रयासमा उद्धार गरिएको थियो । नाटकीय तर शाहसीक ढंगले जोखिमपूर्ण रुपमा उद्धार गरेर उनीहरुलाई पानीले भरिएको गुफाबाट बाहिर निकालिएको थियो ।
सार्वजनिक गरिएको भिडियोमा उपचारका लागि भर्ना गरिएका बालकले मास्क लगाएको देखिएको छ । उनीहरुले अस्पतालको गाउन पहिरिएका छन् । उद्धार अभियान सफलतापूर्वक सम्पन्न भएको भिडियो पनि सार्वजनिक गरिएको छ ।
यसमा जोखिमपूर्ण उद्धारको मिसन कसरी संचालन गरिएको थियो भन्ने देखाइएको छ । थाइल्यान्डका १२ जना फुटबल खेल्ने बालक र उनीहरुको प्रशिक्षक गत जुन २३ मा गुफाभित्र फसेका थिए ।
यसैबीच थाइल्यान्डको स्वास्थ्य मन्त्रालयले उद्धार गरिएका सबैको स्वास्थ्य अवस्था राम्रो रहेको जनाएको छ । १७ दिनसम्म गुफामा फसेपछि विद्यार्थीहरुको तौल भने २ किलोसम्म घटेको छ । (एजेन्सी)
