मलेसियाबाट फर्किएका ७७ जिल्लाका युवाहरुको काठमाडौँमा भेला

156
views

काठमाडौं, १८ पुस । सरकारले विदेशबाट फर्कने नेपाली युवालाई प्रदान गर्ने रु दश लाखबाट आफूले सिकेको सीपलाई सदुपयोग गराउने उद्देश्यका साथ मलेसियाबाट फर्किएका युवाको पहिलो राष्ट्रिय भेला मंगलबार सम्पन्न भएको छ ।

स्वरोजगारबाट देशको अर्थतन्त्रमा सहयोग गर्ने उद्देश्यका साथ भेलाको आयोजना गरिएको हो । ‘मलेसिया रिटर्नी समाज नेपाल’ देशका ७७ वटै जिल्लाबाट मलेसियामा गई रोजगारी गरेर फर्किएका युवाका लागि सो भेलाको आयोजना गरेको हो ।

विशेष गरी खाडी मुलुकमा गएर फर्किएका नेपाली युवाका पक्षमा नेपाल युवा परिषद्ले गरेको प्रयासबाट नै रु १० लाख सहुलियत ऋण दिने व्यवस्था सरकारले गरेको परिषद्का उपाध्यक्ष माधव ढुङ्गेलले बताए ।

“विकसित मुलुकमा बस्ने नेपालीले आफू नेपाली भएकामा आफैँलाई धिक्कार्छन्, तर जो खाडी मुलुकमा गएर काम गर्छन्, उनीहरु समृद्ध नेपालको सपना लिएर स्वदेशमै फर्कन्छन्”, ढुङ्गेलले भने ।

युवा परिषद्को तथ्याङ्कअनुसार २४ प्रतिशत अर्धदक्ष जनशक्ति विकसित मुलुकमा छन् भने ७० प्रतिशत युवा खाडीमुलुकमा काम गरिरहेका छन् । वैदेशिक रोजगार प्रवद्र्धन बोर्डमा निःशुल्करुपमा फारम वितरण गराउँदा पनि ठगीका घटना अगाडि आइरहेको बोर्डका कार्यकारी प्रमुख राजन श्रेष्ठले जानकारी दिए । “नेपालभित्रै श्रमको सम्मान गर्ने परिपाटीको विकास हुने हो भने सायद कुनै पनि युवालाई विदेश जानुपर्ने थिएन् होला”, उनले भने ।

नेपालभित्रै उद्यमशीलताको विकास गर्नु अहिलेको आवश्यकता रहेको उनले बताए । वैदेशिक रोजगारीबाट फर्किएका युवालाई पुनःविदेश जाने बाध्यात्मक स्थितिबाट माथि ल्याउन सचेतना दिने उद्देश्यले कार्यक्रमको आयोजना गरिएको रिटर्नी समाज नेपालका बुद्धि भट्टराईले जानकारी दिए ।

भेलाले वैदेशिक रोजगारीबाट फर्किएकालाई एकत्रित गरी समूह गठन गरेर आप्रवासीको राष्ट्रिय सञ्जाल गठन गर्ने, विदेशबाट फर्किएकाको परिवारमा वित्तीय साक्षरता अभिवृद्धि गर्ने, विदेशबाट फर्किएकाको सामूहिक लगानीको सम्भावना खोज्ने, सङ्घ, प्रदेश र स्थानीय सरकारलाई नीतिगत तथा कार्यक्रमगत सुझाव उपलब्ध गराउने एवम् विदेशबाट सिकेको सीप, अनुभव र लगानीलाई देश विकासमा लगाउन रणनीतिक बहसमार्फत सङ्घ, प्रदेश र स्थानीय सरकारलाई सुझाव पेश गर्ने उद्देश्यसमेत भेलाको छ ।

भेलाले २१ जनाको कार्यसमितिसमेत चयन गरेको छ । अध्यक्षमा राजेश श्रेष्ठ, उपाध्यक्षमा विनोद खड्का, महिला उपाध्यक्षमा कोपिला कार्की, महासचिवमा रामचन्द्र नेपाल, सचिवमा विष्णुहरि भण्डारी र कोषाध्यक्षमा प्रकाश क्षेत्री रहेका छन् । सन्सार न्यूजबाट