सुर्खेत । कर्णाली प्रदेशको राजधानी वीरेन्द्रनगबाट दैलेख पुर्याइदिने भन्दै यात्रुबाट एक हजारसम्म भाडा अशुल्ने दुइ चालकलाइ सुर्खेत प्रहरीले पक्राउ गरेको छ । यात्रुबाट महंगो भाडा लिएको पाइएकाले दुईवटा गाडी र त्यसका चालकलाई पक्राउ गरिएको हो ।
भे १ झ ८६८ नम्बरको फोर्स र भे १ च २१३८ नम्बरको स्कार्पियो नियन्त्रणमा लिइएको जिल्ला प्रहरी कार्यालय सुर्खेतका डीएसपी रामप्रसाद घर्तीले जानकारी दिए ।
जिल्ला प्रशासन कार्यालयबाट पास लिने र अरु यात्रुहरूसँग महङ्गो भाडा लिएर बोक्ने गरेको अनुन्धानका क्रममा खुलेको डिएसपी घर्तीले जानकारी दिए । पहिलो पटक गल्ती भएकाले फेरि यस्तो कार्य नगर्न सर्तमा चालकलाई छोडेको घर्तीको भनाइ छ ।
प्रहरीले सञ्चालनरत सवारीमाथि सुक्ष्म रूपमा अनुसन्धान गरिरहेकाले यात्रुलाई ठग्ने, सवारी पासको दुरूपयोग गर्ने सवारी र चालकलाई नियन्त्रणमा लिएर कडा कारबाही गरिने घर्तीले उल्लेख गरे ।
