अर्थमन्त्रि पुन संयुक्त बैठकमा भागलिई स्वदेश फिर्ता

82
views

नवदृष्टि संवाददाता
८, बैशाख

काठमाडौ । अर्थमन्त्री वर्षमान पुन अमेरिकाको वासिङटन डिसीमा आयोजित विश्व बैंक र अन्तर्राष्ट्रिय मुद्रा कोष आईएमएफको वसन्तकालीन संयुक्त बैठकमा भाग लिई शनिबार स्वदेश फर्किएका छन् ।
चार सदस्यीय नेपाली प्रतिनिधि मण्डलको नेतृत्व गर्दै पुन सोमबार अमेरिका प्रस्थान गरेका थिए ।
मन्त्री पुन विश्व बैंक र मुद्रा कोष बैठकमा सहभागी हुनुका साथै जलवायु परिवर्तनको प्रभावले खतरामा रहेका मुलुकहरूको समूह भी–२० को मन्त्रीस्तरीय बैठक, हाइलेभल क्लाइमेट नेक्सससम्बन्धी साइडलाइन बैठक तथा दक्षिण एसियामा स्वच्छ ऊर्जा सङ्क्रमणसम्बन्धी विभिन्न द्विपक्षीय र बहुपक्षीय बैठकहरूमा सहभागी भए ।
पुनले विश्व बैंककी कार्यसञ्चालन प्रबन्ध निर्देशक आना वियर्दे, विश्व बैंकका दक्षिण एसिया हेर्ने उपाध्यक्ष मार्टिन रेजर, विश्व बैंकका विकास वित्त डीएफआई परिचालन हेर्ने उपाध्यक्ष आकिहिको निसिओ, विश्व बैंककै पूर्वाधार क्षेत्र हेर्ने उपाध्यक्ष ग्वाङ्झे चेन, अन्तर्राष्ट्रिय वित्त निगम आईएफसीका उपाध्यक्ष रिकार्डो पुलिटी र अन्तर्राष्ट्रिय मुद्रा कोष आईएमएफका सहायक प्रबन्ध निर्देशक बो–लीसँग भेटघाट गरेका छन् ।
मन्त्री पुनले अमेरिकी अन्तर्राष्ट्रिय विकास नियोग यूएसएआईडीका उच्च पदाधिकारी, अमेरिकी अन्तर्राष्ट्रिय विकास वित्त निगम डीएफपीका पदाधिकारी, अमेरिकन चेम्बर अफ कमर्ससहित निजी क्षेत्रका प्रतिनिधि र त्यहाँस्थित गैरआवासीय नेपालीहरूसँग छुट्टाछुट्टै भेटवार्ता गरेका थिए ।