सामसुङले नोट सिरिजको राम्रो बजार हिस्सा आगट्दै गर्दा, नोट सभेनमा भने ब्याट्री पड्किने समस्या आए पछि सामसुङले बजारमा पठाएका सबै ग्यालेक्सी नोट सेभेन फिर्ता लिएर उत्पादन नै बन्द गरेको थियो । सामसुङले फिर्ता लिएका नोट सेभेन मर्मतपछि पुनः बजारमा पठाउने भन्ने समाचारलाई यसअघि नै पुष्टि गरिसकेको छ । यद्यपि मर्मत गरिएका नोट सेभेनको बिक्रि कहिलेदेखि सुरु हुने भन्ने जानकारी चाहीँ सामसुङले 
आधिकारिक रुपमा गराइसकेको छैन । तर पछिल्लो एक रिपोर्टले आउँदो जुन महिनादेखि ग्यालेक्सी नोट सेभेन बजारमा आउने दाबी गरेको छ ।इटी न्यूज वेबसाइटका अनुसार सामसुले मर्मत गरिएका नोट सेभेन सबैभन्दा पहिले दक्षिण कोरियामा बिक्रि गर्नेछ ।
समाचार अनुसार ग्यालेक्सी नोट सेभेनको मूल्य दक्षिण कोरियाली बजारमा ७ लाख कोरियन वन पर्नेछ । यो भनेको झण्डै ६४ हजार नेपाली रुपैयाँ हो । जबकी सुरुमा लञ्च गर्दा गतवर्ष ग्यालेक्सी नोट सेभेनको मूल्य ९ लाख ८८ हजार ९ सय कोरियन वन अर्थात् झण्डै ९६ हजार तोकिएको थियो ।
मर्मत गरिएको नोट सेभेनमा ब्याट्रीको साइज यसको ओरिजिनल भर्सनमा भन्दा सानो हुनेछ । समस्याग्रस्त ३५ सय मिलिएम्पियर आवरको ब्याट्रीको साटो यसमा ३ हजार देखि ३२ सय मिलि एम्पियर आवरको ब्याट्री प्रयोग गरिनेछ ।
फिर्ता लिएका ३० देखि ४० लाख नोट सेभेन मध्ये मर्मत गरिएका ३ लाख नोट सेभेन कोरियामा बेच्ने लक्ष्य सामसुङको छ ।नोट सेभेनको नाम पनि बदलेर नोट सेभेन आर राखिनेछ । जहाँ आर को अर्थ रिफर्बिस्ड अर्थात् फिर्तापछि मर्मत गरिएको भन्ने हुन्छ ।
स्मरण रहोस् ग्यालेक्सी नोट सेभेनमा ५।७ इन्चको क्वाड एचडी डुअल एज सुपर एमोलेड डिस्प्ले, १४४० गुणा २५६० पिक्सेल रिजोलुसन र स्क्रिनमा कोर्निंग गोरिल्ला ग्लास लगाइएको छ । त्यसमा अक्टाकोर एक्जीनोस ८८९० प्रोसेसर तथा ४ जिबीको र्याम रहेको छ । साथै नोट सेभेनमा १२ मेगापिक्सेलको डुअल पिक्सेल क्यामरा रहेको छ जसमा अप्टिकल इमेज स्टाबिलाइजेसन प्रविधि रहेको छ । साथै यसमा ५ मेगापिक्सेलको सेल्फी क्यामरा पनि रहेको छ । एजेन्सी
