पर्वत, ७ फागुन । नेपाली सेनाको श्री सैनिक शारीरिक तालिम तथा खेलकुद केन्द्रको कभर्डहल लगनखेलमा सञ्चालित प्रधान सेनापति तेस्रो राष्ट्रिय पुरुष भलिबल प्रतियोगितामा आठ टिमले सहभागिता जनाएका छन् ।
आईतबार देखी फाल्गुन १२ गतेसम्म सञ्चालन हुने उक्त प्रतियोगितामा नेपाली सेनाको त्रिभुवन आर्मी क्लब, नेपाल प्रहरी र सशस्त्र प्रहरी बलको एक÷एक तथा तात्कालिन पाँच विकास क्षेत्रका पाँच भलिबल टिमगरी जम्मा आठ टिमको सहभागिता रहेको नेपाली सेनाले जनाएको छ ।
प्रतियोगितामा नेपाली सेनाले खेलकुद जगतको विकास तथा खेलाडीहरुको हौसला वृद्धि गर्न नेपाल इन्भेष्टमेण्ट बैंकको सहकार्यमा प्रथम, द्धितिय र तृतिय हुने विजेता टिमलाई तीनलाख, एकलाख ५० हजार र ७५ हजार नगद पुरस्कारको समेत व्यवस्था गरेको छ । साथै उत्कृष्ट स्पाईकर, ब्लकर, डिफेण्डर, लिफ्टर र कोचलाई समेत १०÷१० हजार नगद पुरस्कारको व्यवस्था गरेको छ ।
प्रतियोगिताको बलाधिकृत रथी पूर्णचन्द्र थापाले समुद्घाटन गर्नुभएको थियो । समुद्घाटन कार्यक्रममा सशस्त्र प्रहरी बलका महानिरिक्षक, राष्ट्रिय अनुसन्धान विभागका निर्देशक, नेपाली सेनाका रथीवृन्द, अन्य सुरक्षा निकायका उच्च पदस्थ अधिकारीहरु, अखिल नेपाल भलिबल सङ्घका पदाधिकारीहरु, नेपाली सेनाका अधिकृतहरु, नेपाल इन्भेष्टमेण्ट बैंकका प्रतिनिधि उपस्थिती रहेको थियो ।
नेपाली सेनाले आयोजना गरेको उक्त भलिबल प्रतियोगिताले नागरिक र सैनिक सम्बन्ध सुदृढ एवम् प्रगाढ बनाउन मद्दत पुग्नुको साथै राष्ट्रिय तथा अन्तर्राष्ट्रिय खेलकुदको बिकासमा समेत थप टेवा पुग्न जाने विश्वास नेपाली सेनाले लिएको छ ।
