सीमावर्ती गाउँ पानमुन्जोममा अप्रत्याशित रूपमा उत्तर कोरियाली नेता किम जङ–अनसँग भएको भेटवार्तामा आफूले खुलेर विचारहरू आदानप्रदान गरेको दक्षिण कोरियाका राष्ट्रपति मून जे(इनले बताएका छन् ।
दक्षिण कोरियाका राष्ट्रपतिको वक्तव्यमा उत्तर कोरिया र संयुक्त राज्य अमेरिकाबीचको शिखर बैठकलाई सफल पार्नुपर्ने आवश्यकता पनि औँल्याइएको छ ।
यसअघि पूर्वनिर्धारीत बैठकको मिति रद्द भएको बताएका राष्ट्रपति ट्रम्पले पछि उक्त वार्ता तोकिएकै समयमा हुने सम्भावना रहेको पनि उल्लेख गरेका थिए । ह्वाइट हाउसले सम्भावित शीर्ष बैठकको तयारीका लागि एउटा टोली सिंगापुर पठाउँदैछ।
वार्ता
किम जङ-अन र राष्ट्रपति मूनको आकस्मिक बैठकले दुवै नेताहरू वार्ता अघि बढाउन इच्छुक रहेको प्रस्ट पारेको छ । दुई हप्ताअघि दुई नेताबीच शुरूमा सकारात्मक देखिएका छलफल स्थगन गरिएका थिए ।
तर दुई घण्टा लामो पछिल्लो भेटघाट र क्यामेरामा तस्वीर खिचाउने क्रममा देखिएका अंकमालका दृश्यपछि उत्तर कोरियाली सरकारी सञ्चारमाध्यमले शुक्रवार दुवै देशबीच थप छलफल हुने जनाएको छ ।
अनि आउँदो बैठकमा पनि दुवै नेताले हुने या नहुने दुवै भनिएको राष्ट्रपति ट्रम्प र किमबीचको शिखर बैठकबारे छलफल गर्नेछन् ।
उत्तर कोरियाली सञ्चारमाध्यमले किम जङ(अन जुन १२ मा नै उक्त शिखर बैठक आयोजना होओस् भन्नेमा दृढ रहेको जनाएको छ । पूर्वनिर्धारीत मितिमा वार्ता हुने या नहुने अस्पष्टै रहेपनि ह्वाइट हाउसले एउटा तयारी टोली सिंगापुर पठाउँदैछ ।
संकेत
बैठक रद्द गरेको केही दिनपछि नै राष्ट्रपति ट्रम्पले शिखर बैठक होओस् भन्ने आफूले चाहेको देखाउन हरसम्भव संकेतहरू दिइरहेका छन् ।
यसअघि उत्तर कोरियाली नेताले व्यक्त गरेको ’चरम आक्रोश र खुला वैरभाव’का कारण वार्ता रद्द गरिएको भन्दै ट्रम्पले उत्तर कोरियाली नेतालाई पत्र पठाएका थिए ।
तर उनले शुक्रवार किमसँगको शिखर बैठक पुनः आयोजना गर्ने बारे उत्तर कोरियासँग ’एकदमै सकारात्मक छलफल’ भएको संवाददाताहरूलाई बताए ।
उनले उत्तर कोरियासँग कुराकानी भइरहेको र उनीहरूले वार्ता रद्द गरिएपछि राम्रो विज्ञप्ति बाहिर ल्याएको पनि उल्लेख गरेका थिए ।
वार्ता रद्द भएपछि उत्तर कोरियाका उपविदेशमन्त्रीले ट्रम्पको निर्णय अनपेक्षित र खेदजनक भएको र प्योङयाङ जुनसुकै बेला पनि प्रत्यक्ष वार्तामा बस्न तयार रहेको बताएका थिए । बीबीसी ।
