काठमाडौं । नेकपा एमालेका अध्यक्ष केपी शर्मा ओली नेतृत्वको ‘केन्द्रीय कमिटी’ बैठकले माधवकुमार नेपाल समुहमाथि अप्रत्यक्ष कार्वाहीको प्रक्रिया थालेको छ । सो समुहका चारजनालाई ओली समुहको बैठकले स्पष्टिकरण सोध्ने निर्णयबाट कार्वाही प्रक्रिया थालेको हो । ओली समुहले माधवकुमार सहितिका चार नेतालाई स्पष्टीकरण सोध्ने निर्णय गरेको छ ।
वरिष्ठ नेता माधवकुमार नेपाल समूहको बहिस्कारका बीच शनिबार बसेको बैठकले नेता नेपालसँगै भीम रावल, सुरेन्द्र पाण्डे र घनश्याम भुसाललाई स्पष्टीकरण सोध्ने निर्णय गरेको हो ।
नेपाल समूहले चैत ४ र ५ गते राष्ट्रिय कार्यकर्ता भेला गरेको थियो, त्यसमा चार मुख्य जिम्मेवार रहेको बालुवाटार बैठकको ठहर छ । भेला नगर्न निर्देशन हुँदाहुँदै नेकपा एमालेको व्यानरमा भेला गर्नु अनुशासनको उल्लंघन भएकाले स्पष्टीकरण सोध्ने निर्णय गरेको प्रवक्ता प्रदीप ज्ञवालीले बताए ।
चार नेताले दिने जवाफका आधारमा अरु प्रक्रिया अगाडि बढ्ने भन्दै उनले अघि भने, ‘फागुन २३ अगाडिका गतिविधिलाई एक ढंगले हेर्न सकिएला, तर त्यसपछि पनि लगातार गुटबन्दी गरिरहनु कदापि क्षम्य मान्न सकिँदैन ।’
बाँकी नेताहरुको हकमा गम्भीर आत्मसमीक्षाका साथ पार्टीमा फर्किने विश्वास राखेको उनले बताए । पार्टीको नाममा समानान्तर गतिविधि भए विधान आकर्षित हुने समेत उनले बताए ।
स्रोतका अनुसार नेतृ रामकुमारी झाँक्रीलाई पनि स्पष्टीकरण सोध्ने भनिएको थियो । केन्द्रीय सदस्यहरुले झाँक्रीसँगै अष्टलक्ष्मी शाक्यलाई पनि कारबाही गर्नुपर्ने माग गरेका थिए । तर ‘हाइट’ नपुगेको भन्दै अध्यक्ष ओलीले शाक्य र झाँकीलाई स्पष्टीकरण नसोध्ने बताएको एक केन्द्रीय सदस्यले बताए ।
