गृहमन्त्रिको अर्को योजना– ट्राफिक प्रहरीलाई दुईसय भत्ता

नवदृष्टि संवाददाता
काठमाण्डौ, २३, श्रावण । ट्राफिक प्रहरीलाई दैनिक २०० रुपैयाँ भत्ता दिने सरकारले निर्णय गरेको छ । गृहमन्त्री जनार्दन शर्मा ‘प्रभाकर’ ले ट्राफिक प्रहरीलाई दैनिक रु २०० विषेश भत्ता दिने प्रस्ताव अर्थ मन्त्रालय पठाइएको जानकारी दिए । शर्मा गृहमन्त्री भएसँगै ट्राफिक प्रहरीले पाउँदै आएको जरिवाना वापतको १५ प्रतिशत कमिसन कटौती गरिएको थियो ।
‘प्रहरीले जरिवानाको १५ प्रतिशत पाउनकै लागि कारवाही गर्ने गरेको आक्षेप लागेपछि सो रकम रकम कटौती गरिएको हो’ सोमबार व्यवस्थापिका संसदको विकास समितिमा बोल्दै मन्त्री शर्माले भने, ‘त्यसको अलावा दैनिक २ सय रुपैयाँ विशेष भत्ता दिने प्रस्ताव गरिएको छ ।’
आफूले गृह मन्त्रालय सम्हालेपछि उपत्यकाको ट्राफिक ब्यवस्थापनको समस्या कसरी हल गर्ने भन्नेबारे काठमाडौं महानगरपालिकाको कार्यकारी प्रमुखको नेतृत्वमा टिम बनाएर काम थालेको जानकारी गराउँदै मन्त्री शर्माले स्थायी रुपमा समस्याको हल गर्न दीर्घकालीन योजना बनाउनुपर्ने बताए । सार्वजनिक बसहरु समयमा तोकिएको स्थानमा पुग्नका लागी काठमाण्डौं उपत्यकामा छुट्टै लेनको ब्यवस्था गर्नुपर्ने पनि मन्त्री शर्माले बताए । ‘यातायात क्षेत्रको एकाधिकार अन्त्य गर्नका लागी आवश्यक पहल गर्नुपर्छ’ मन्त्री शर्माले भने, ‘त्यसका लागी सवैको सहयोग आवश्यक छ ।’ गृहमन्त्री शर्माले राजस्व आउने नाममा जत्तिपनि गाडीहरु आउन दिने अवस्थाका कारण ट्राफिक समस्या बढ्दै गएको उल्लेख गर्दै त्यस्तो ब्यवस्थालाई नियमन गर्नुपर्ने बताए । उपत्यकामा आवश्यक स्थानमा अस्थायी खालका क्रस ब्रिजहरु हालेर तत्कालिन समस्या समाधान गर्न सकिने उल्लेख गर्दै मन्त्रि शर्माले स्याटेलाईट सिटी बनाएर सुविधा विस्तार गर्नुपर्ने बताए ।