म्याग्दी, १८, कात्तिक । म्याग्दीको सबैभन्दा दुर्गम क्षेत्रमा पर्ने धवलागिरि गाउँपालिका–१ गुर्जामा सञ्चालित एकीकृत घुम्ती शिविरबाट ५०० सर्वसाधारणले सरकारी सेवा लिएका छन् ।
भौगोलिक विकटता र गरीबीका कारण सदरमुकाम आएर सार्वजनिक सेवा लिनबाट बञ्चित भएका गुर्जावासीलाई लक्षित गरेर धवलागिरि गाउँपालिका र वडा कार्यालयको समन्वयमा जिल्ला प्रशासन कार्यालयको आयोजनामा दुई दिनसम्म शिविर सञ्चालन भएको थियो ।
शिविरमा ५०० जनाले जग्गाधनी पुर्जा, नागरिकता, नापीको कित्ताकाट र नक्सा देखाउने, स्वास्थ्य उपचार र अपाङ्गता परिचयपत्रका लागि सिफारिश सेवा लिएका वडाध्यक्ष झकबहादुर छन्त्यालले जानकारी दिए ।
जिल्ला प्रशासन कार्यालयको टोलीले ८६ जनालाई नागरिकता वितरण गरेको, नापी कार्यालयको टोलीले १५० जनालाई जग्गाको कित्ताकाट र नक्सा पहिचान गरेर देखाउने सेवा दिएको प्रजिअ लीलाधर अधिकारीले बताए ।
घुम्ति शिवरमा ४० जनालाई जग्गाको नामसारी र अंशबण्डासम्बन्धी सेवा, २५ नामसारी र ३० संशोधनसम्बन्धी सेवा दिइएको मालपोत अधिकृत मुकुन्द पौडेलले बताए ।
बेनी अस्पतालका चिकित्सक बिराट शर्माको टोलीले १५० जनालाई स्वास्थ्य परीक्षण, परामर्श र निःशुल्क औषधि वितरण सेवा दिएको थियो । महिला तथा बालबालिका कार्यालयको टोलीले नौ जनालाई अपाङ्गता परिचयपत्र वितरणका लागि सिफारिश गरेको थियो ।
