काठमाडौं, ९ पौष । सवैको कल्याण गर्ने मूल आशय रहेको पूर्वीय ज्ञानको भण्डारलाई जीवन्त राख्न र आधुनिक प्रविधिहरु सहितको विज्ञानबाट नेपाली समुदायले फाइदा लिन मुलुकको शिक्षा पद्धतिमा आमूल परिवर्तन आवश्यक रहेको साहित्यकार तथा पूर्व शिक्षामन्त्री मोदनाथ प्रश्रितले बताउनुभएको छ । उहाँले भन्नुभयो “हाम्रा पूर्वजहरुले असल भावना र कल्पनाशीलताको ज्ञान छर्दै थिए । तर, अहिले नेपालमा शिक्षाको केवल व्यापारिकरण भइरहेछ । पढाइ त भइरहेको छ तर सीपमूलक ज्ञानको अभाव छ । त्यसैले थर र गोत्र अनि जात जातीको कुरामा हामी अल्झिएका छौँ ।”
लेखक पुष्पराज पौडेलले सिर्जना गर्नुभएको र हेड्स नेपालले प्रकाशनमा ल्याएको नयाँ पुस्तक शिक्षाका ती दिनको काठमाण्डौँको पद्मकन्या कलेजको सभाहलमा विमोचन गर्दै साहित्यकार प्रश्रितले सो कुरा भन्नु भएको हो ।
एक सय पाँच शिर्षकका लेख रहेको २०५ पृष्ठको सो पुस्तकमा नेपालको शिक्षा क्षेत्रको विकासको अनुसन्धान तथा विगत ५० वर्षमा लेखकले भोगेका शैक्षिक क्षेत्रका संस्मरण पढ्न पाइन्छ । पुस्तकको मूल्य रु. ३०० रहेको छ ।
प्राज्ञ नमुना शर्मा, साहित्यकार तीर्थराज वन्त, रमेश पौडेल लगायतले पुस्तकको सान्दर्भिकता बारे कार्यक्रममा जानकारी गराउनुभएको थियो । खरीले लेखेको र धुलौटोमा कोरेको अवस्थामा गरिएका अनुभवहरु सुनाउनुभएको थियो ।
प्रकाशक हेड्स नेपालका केन्द्रीय सदस्य दिव्यराज पौडेलले भन्नुभयो- सँस्थाको यो छैटौँ प्रकाशनले नेपालको शिक्षा इतिहासलाई नजिकबाट नियाल्न मद्यत पुग्नेछ र अभिभावक, विद्यार्थी तथा शिक्षकलाई यो उपयोगी रहने छ ।
हेड्स नेपालका अध्यक्ष वरिष्ठ इन्जिनियर इश्वरचन्द्र बानियाको अध्यक्षता र पुष्पा खनालबाट सञ्चालित कार्यक्रममा सँस्थाका महासचिव रामकृष्ण धरेलले सहभागीलाई स्वागत् गर्नुभएको र सँस्थापक प्रतापराज वन्तले धन्यवाद दिनुभएको थियो ।
