काठमाडौँ, पुस २८ नेपाल कम्युनिस्ट पार्टी (नेकपा) ले सम्पूर्ण साङ्गठनिक एकीकरण टुङ्गो लगाउन गठन गरेको कार्यदललाई आफ्नो प्रतिवेदन बुझाउन थप समय लाग्ने भएको छ ।
पुस मसान्तभित्र सम्पूर्ण साङ्गठनिक एकीकरणको टुङ्गो लगाउन गृहकार्य गरी प्रस्ताव पेस गर्न पुस १३ गते सकिएको स्थायी कमिटीको बैठकले निर्देशन दिएको थियो । तर, हालसम्म मापदण्ड तयार गरी पार्टीको विधानमा मात्र छलफल सकिएको छ । नौ सदस्य कार्यदलमा चारजना मन्त्री नै रहेको हुनाले उहाँहरूकोे कार्य व्यस्तताका कारण नियमित बैठक समेत बस्न सकिरहेको छैन ।
कार्यदलका संयोजकमा गृहमन्त्री रामबहादुर थापा , ऊर्जा, जलस्रोत तथा सिँचाइमन्त्री वर्षमान पुन, भौतिक तथा यातायातमन्त्री रघुवीर महासेठ र प्रदेश ५ का मुख्यमन्त्री शङ्कर पोखरेल प्रदेश ५ का मुख्यमन्त्री हुनुहुन्छ । बाँकी सदस्य पार्टीका महासचिव विष्णुप्रसाद पौडेल, स्थायी कमिटी सदस्य योगेश भट्टराई, बेदुराम भुसाल, सुरेन्द्र पाण्डे र लेखराज भट्ट रहनुभएको छ ।
कार्यदलका सदस्य पाण्डले भन्नुभयो, ‘‘समयमै प्रतिवेदन तयार गरेर पार्टीलाई बुझाउन खोजेका थियौं तर यो पुसमसान्तभित्र नभ्याउँला जस्तो छ । सदस्यहरूको कार्यव्यस्तताका कारण नियमित बैठक पनि बस्न सकिरहेको छैन ।’’ प्रधानमन्त्री एवं पार्टी अध्यक्ष केपी शर्मा ओली र अर्का अध्यक्ष पुष्पकमल दाहाल ‘प्रचण्ड’ ले पुस १६ गते कार्यदलका सदस्यहरुलाई बोलाएर कामको प्रगतिको बारेमा जानकारी लिनुभएको थियो । साथै, उहाँहरुले १० दिनभित्र आफ्नो काम सकाएर सचिवालयमा प्रतिवेदन पेस गर्न सदस्यहरुलाई निर्देशन समेत दिनुभएको थियो । अध्यक्षद्वयले दिनुभएको निर्देशन अनुसारको समय सीमा बिहीबार नै सकिएको हो ।
कार्यदलका सदस्य भुसालले १० दिनको समयसीमा तोकेको कुरा मिडियामा आएको कुरा मात्र रहेको दावी गर्दै अध्यक्षद्वयले जतिसक्दो छिटो प्रस्ताव तयार गर्न भन्नुभएको र त्यो अनुसार काम भइरहेको बताउनुभयो । छिट्टै सकिने गरी आफूहरुले काम गरिरहेको उहाँले जानकारीे दिनुभयो ।
‘यति दिनभित्रै सकिनै पर्छ भनी अदालतको म्याद जस्तो पार्टीको काम हुँदैन त्यसैले केही समय लाग्न सक्छ,’ उहाँले भन्नुभयो
