अमेरिकी राष्ट्रपति डोनल्ड ट्रम्पले अमेरिका–मेक्सिको सीमामा पर्खाल लगाउन आठ अर्ब ६० करोड अमेरिकी डलर आवश्यक रहेको भन्दै सो रकम उपलब्ध गराउन अमेरिकी कँग्रेस समक्ष पुनः आग्रह गरेका छन् । ट्रम्पले उक्त बजेट मागसँगै राष्ट्रपति ट्रम्प र कँग्रेसबीच फेरि सङ्घर्ष चर्किने खतरा बढेको छ ।
आज (सोमबार) सार्वजनिक गरिने सन् २०२० को बजेटमा गत वर्ष माग गरिएको ५ अर्ब ७० करोड डलरभन्दा यो निकै बढी हुने बताइन्छ । पर्खाल निर्माणका लागि अघिल्लोपटक माग गरिएको रकमका विषयमा कङ्ग्रेसमा सहमति नहुँदा अमेरिकी सङ्घीय कार्यालयहरु ३५ दिनसम्म आंशिक रुपमा बन्द भएका थिए ।
अमेरिकी इतिहासमै सबैभन्दा लामो अवधिसम्म कार्यालय बन्द हुँदा आठ लाखभन्दा बढी कर्मचारी प्रभावित भएका एपीएफले जनाएको छ ।
डेमोक्याट्रिक पार्टीका तर्फबाट सभामुख भएकी न्यान्सी पेलोसी र सिनेटमा डेमोक्र्या्टिक पार्टीका नेता चक सुमर दुबैले राष्ट्रपतिको आग्रहप्रति आपत्ति जनाइसकेका छन् । राष्ट्रपति ट्रम्पले जबर्जस्ती गरे कङ्ग्रेसले बजेट अस्वीकृत गर्ने चेतावनी उनीहरुले दिएका छन् ।
ह्वाइट हाउसका आर्थिक सल्लाहकार ल्यारी कुड्लोले नयाँ प्रस्तावले फेरि संसदमा विवाद उत्पन्न हुनसक्ने स्वीकार गर्दै शक्ति सङ्घर्ष चर्कने प्रतिक्रिया दिए । तर राष्ट्रपति ट्रम्प आफ्नो चुनावी वचनबद्धताप्रति अहिले पनि अडिग रहेका उनको भनाई छ ।
अमेरिकी कङ्ग्रेसमा डेमोक्र्याट पार्टीको बहुमत रहेकाले ट्रम्पको नयाँ योजना पारित हुने सम्भावना ज्यादै न्यून छ । न्यान्सी पेलोसी र चक सुमरले जारी गर्नुभएको संयुक्त वक्तव्यमा अति खर्चिलो र अप्रभावकारी पर्खाल निर्माणको निहुँ बनाएर राष्ट्रपति ट्रम्पले लाखौं लाख अमेरिकीको चित्त दुखाएको बताएका छन् ।
कङ्ग्रेसले यो पर्खालमा लगानी गर्न अस्वीकृति जनाएर राष्ट्रपतिलाई हार स्वीकार्न बाध्य पारेको थियो । तर अहिले राष्ट्रपतिले पुरानो कुरा दोहोर्याउन चाहेको देखिन्छ ।
अमेरिकी अखबार वासिङ्टन पोस्टका अनुसार राष्ट्रपतिले आन्तरिक सुरक्षा विभाग मार्फत ५ अर्ब र रक्षा मन्त्रालयबाट ३ अर्ब ६० करोड डलर बजेट विनियोजन गरी त्यसलाई पर्खाल निर्माणमा लगाउने भित्री योजना बनाएका छन् ।
ह्वाइट हाउसका कतिपय अधिकारीहरुले कङ्ग्रेसले पर्खाल निर्माणका लागि बजेट विनियोजन नगरे राष्ट्रपतिले सीमामा आपतकालीन स्थिति घोषणा गरी बजेटमा विशेषाधिकार (भिटो) लगाउन सक्ने बताएका छन् ।
