राजधानी काठमाण्डौ अपराधी बस्ने ठाउँ – गृहमन्त्री

काठमाडौं, २०, श्रावण । गृहमन्त्री जनार्दन शर्माले राजधानी काठमाण्डौलाई ‘क्लिन’ बनाउने भन्दै नयाँ योजना सार्वजनिक गरेका छन् । शुक्रबार मन्त्रालयमा आयोजित नियमित पत्रकार सम्मेलनमा शर्माले ठगी, अपराध, गुण्डागर्दी, चेलीबेटी बेचबिखनलगायत सबै अपराध नियन्त्रण गरेर राजधानीलाई ‘क्लिन’ बनाउने योजना सार्वजनिक गरेका हुन् । राजधानी काठमाडौंमा ‘सबैभन्दा बढी अपराध हुन्छन् । ठगी, गुण्डागर्दी, चेलीबटची बेचबिखन लगायतका अपराधलाई देशबाटै अन्त्य गर्न सबैभन्दा पहिला ‘क्लिन’ काठमाण्डौं अभियान सफल हुनुपर्छ’, मन्त्री शर्माले भने, ‘काठमाडौं अपराधी बस्ने ठाउँ बन्दै गएको छ, अपराध नियन्त्रणका निम्ति जनस्तरबाटै अभियान चाल्नुपर्छ ।’ मन्त्री शर्माले यस्ता अपराध नियन्त्रणका लागि जनस्तरबाटै जनचेतना अभिवृद्धि गर्दै व्यापक प्रहरी परिचालन गर्ने योजना समेत सार्वजनिक गरे । ‘अपराध नियन्त्रण गर्न प्रहरीलाई जिम्मेवार बनाउनुपर्छ’, मन्त्री शर्माले भने । मन्त्री शर्माले शान्ति सुरक्षा र अपराध नियन्त्रणका निम्ति हाम्रा भन्दा पनि राम्रा प्रहरी अधिकृत खटाउने समेत बताए ।