काठमाण्डौ, १५ फागुन । आईसीसी विश्व कप क्रिकेटको छनोट प्रतियोगिता खेल्न जिम्बाबे पुगेको नेपाली राष्ट्रिय क्रिकेट टोलीले आज पहिलो अभ्यास खेलमा युनाईटेड अरब ईमिरेट्स युएईको सामना गर्नेछ ।
नेपालले यही बिहीबार हङकङसँग दोस्रो अभ्यास खेल खेल्नेछ । नामिबियामा केही दिन अघि सम्पन्न विश्व क्रिकेट लिग डिभिजन दुई प्रतियोगिताको शीर्ष दुईमा रहँदै युएई र नेपालले एक दिवसीय विश्वकप छनोट प्रतियोगितामा स्थान बनाएका हुन् ।
दुई साताको फरकमा नेपालल युएईसँग तेस्रो पटक खेल्न लागेको हो । नामिबियामा भएको डिभिजन २ को खेलमा नेपालले समूह चरणमा युएईलाई ६ विकेटले पराजित गर्दा फाइनलमा ७ रनले हारेको थियो ।
जिम्बाबेमा मार्च ४ देखि हुने छनोट प्रतियोगितामा नेपालसहित १० राष्ट्र सहभागी छन् । जसमा उत्कृष्ट हुने २ टिम विश्वकप खेल्न पाउनेछन् । प्रतियोगिताबाट उत्कृष्ट ३ एसोसिएट राष्ट्रले एकदिवसीय राष्ट्रको मान्यता पाउनेछन् ।
नेपाल समूह ‘बी’ मा अफगानिस्तान, जिम्बाबे, हङकङ र स्कटल्याण्डसँगै रहेको छ । नेपालले पहिलो खेल फागुन २० गते आइतबार घरेलु टोली जिम्बावे विरुद्ध खेल्नेछ ।
दोस्रो खेलमा नेपालले फागुन २४ स्कटल्याण्डको सामना गर्नेछ भने फागुन २६ मा अफगानिस्तान र फागुन २८ मा हङकङको सामना गर्नेछ ।
