हुम्ला, ३०, असार । हिमाली जिल्ला हुम्लाको एकमात्र यातायातको साधन हवाई सेवा दुई दिनदेखि अवरुद्ध छ । मङ्गलबार बिहानदैखि कुहिरो लाग्ने र पानी परेका कारण हवाई सेवा अवरुद्ध भएको हो ।
नागरिक उड्डयन प्राधिकरण सिमकोट शाखाका निमित्त प्रबन्धक नबराज कटुवालले दुई दिनदेखि हवाई सेवा अवरुद्ध भएको जानकारी दिए ।
एकातिर खराब मौसम र अर्कोतिर बिहानैबाट कुहिरो लाग्ने, पानी पर्ने भइरहेका कारण नेपालगञ्ज र सुर्खेतमा जहाजहरू सिमकोटका लागि उडान भर्न नसकेको कटुवालले जानकारी दिए ।
हवाई सेवा अवरुद्ध भएपछि जिल्लामा भित्रिने ९० जना र जिल्ला बाहिर जाने ७८ जना यात्रु रोकिएका छन् ।
उडान अवरुद्धसँग त्यससँगै खाद्यान्न, विकास निर्माण सामग्री र कार्गोको सामान पनि ढुवानी हुन सकेको छैन । यसले विकासे काममा समेत बाधा पु¥याएको छ ।
हवाई सेवा सुचारु नहुँदा तरकारी तथा मासुको पनि समस्या देखिएको छ । त्यसैगरी हवाई सेवा सुचारु नभएपछि राष्ट्रिय वाणिज्य बैङ्कका लागि नेपालगञ्जबाट ल्याउनुपर्ने पैसा पनि रोकिएको छ ।
सिमकोटमा तारा, सीता र समिट एयरका जहाजहरूले दैनिक १५ भन्दा बढी उडान भर्दै आएका थिए ।
